Subong na nga Lunes ang ulihi nga adlaw sang substitution para sa mga nagfile sang certificate of candidacy para sa 2022 elections.
Sa interview sang Bombo Radyo kay Negros Occidental Provincial Election Supervisor Atty. Ian Lee Ananoria, bukas ang opisina sang Comelec halin alas-8:00 sa aga tubtub alas-5:00 sa hapon.
Wala naman nagapati si Ananoria nga madamo ang mawithdraw ukon masubstitute sa Negros Occidental bangud nagapati ini nga desidido na ang mga kandidato diri.
Suno diri, human na ang pinsar sang mga nagfile sang COC sang bulan sang Oktubre nga mapadalagan sa 2022 elections.
Sang Sabado, wala naman sang may nagfile sang statement of withdrawal ukon nagsubstitute sa Comelec Bacolod.
Ginalauman naman sang Commission on Elections Negros Occidental nga indi man maglapaw sa duha ka milyon ang numero sang registered voters sa probinsya para sa May 9, 2022 elections.
Sa interview sang Bombo Radyo kay Negros Occidental Provincial Election Supervisor Atty. Ian Lee Ananoria, natapos ang hearing sang Election Registration Board apang may yara pa sang final verification angot diri.
Mahimo suno sa iya nga mapatigayon ang verification sa masunod nga semana kag mapagwa sa Huwebes ang final nga numero sang mga botante.
Ang pinakaulihi nga figure ang nagapakita nga may yara sang 1.9 million ang registered voters sa bilog nga probinsya kag nagaduda si Ananoria nga magalapaw ini sa 2 million.
Nagpanugyan naman si Ananoria sa mga botante nga lantawon na nga daan ang masterlist kun mapagwa na sang Comelec agud mahibaluan ang precinct number antes ang adlaw sang eleksyon kag indi magsala-sala.
Suno diri, may mga adjustments ang Comelec bangud sa COVID pandemic gani magabuhin ang numero sang voters sa isa ka classroom.
