Wala sang may nabaton nga statement of withdrawal kag substitution ang Commission on Elections (Comelec) Bacolod humalin sang natapos ang filing sang certificate of candidacy.
Sa interview sang Bombo Radyo kay Atty. Kathrina Trinio Caña, nagapadayon pa sa karun ang ila pagproseso sang deletion sang mga patay, nagtransfer kag mga double registrations.
Pagkatapos sini, suno kay Caña, magapreparar naman sila sang voter’s precinct.
Suno sa iya, sang nagligad nga eleksyon, nagadangat sa 1,000 ang maximum nga voters sa isa ka presinto apang sa karun, yara lamang ini sang 800 gani kinahanglan nila magdugang sang pasilidad.
Natapos naman suno sa iya ang ERB hearing apang may kapin 8,000 pa nga wala nadala sa consolidation bangud ginauna pa nila ang deletion.
Sa karun nagdangat na sa 320,920 ang mga registered voters sa Bacolod City.
