Ginapanugyan sang concenor sa 1Sambayan coalition nga sa pagtakop sang mangin eleksyon sa 2022 kag sa pagpungko sang panibag-o nga kongreso, dapat nga I-ammend sang mga pumuluyo ang Omnibus Election Code sang Pilipinas.
Pahayag ni former Negros Occidental Governor Rafael “Lito” Coscolluela nga ginahampangan lang sa karun sang mga kandidato ang Omnibus Election Code ilabi na ang substitution.
Suno diri, kaangay nga nangin hampang nalang ini para sa benepisyo sang isa ka partido ukon persona.
Panindugan ni Coscolluela nga dapat mapressure sang mga pumuluyo ang panibag-o nga mangin katapo sang kongreso nga ma-amyendahan ang Omnibus Election Code agud nga indi na masulit sa masunod pa nga mga eleksyon ang kaangay nga paghampang.
Paathag sang anay gobernador nga duha ang dapat nga amyendahan kag amo ang provision on substitution kag ang constitutional provisions on dynasties.
Suno kay Coscolluela, sa karun bisan sin-o nalang ang mahimo magsubstitute kun sa diin nagabutang lang sang temporaryo nga place holder sa umpisa apang sa ulihi nga minuto nagalutaw naman ang matuod nga may plano sa pagpadalagan sa pwesto.
Samtang ginhalimbawa naman sang anay gobernador nga kaangay nga dynasties ang pagpadalagan ni Davao City Mayor Sara Duterte bilang Bise Presidente, Presidente Rodrigo Duterte sa pagka-Senador samtang ang iban pa nga kabataan sang presidente ang nagapapili naman sa iban pa nga pwesto sa gobyerno.
Ginakasubo ni Coscolluela nga tubtob sa karun wala pa sang may napasar nga layi agud nga maprebentar ang dynasties nga nagadominar sa karun sa politika sang Pilipinas.
Ginalantaw man sang anay gobernador nga mabudlay ang pagpatay sang dynasties bangod mismo ang mga katapo sang kongreso kag senado ang masami imbulbado man diri.
Gani ginapanugyan ni Coscolluela nga ang mga pumuluyo ang dapat magbuhat sang people’s initiative nga magapressure sa mga mamalidha nga magpasar sang layi batok sa substitution kag dynasties.
Paathag sini nga kun indi mahimuan sang tikang, sa kada eleksyon magasulit-sulit lang ang paghampang sang mga politiko kasubong man magapabilin ang pagdominar sang political dynasties sa pulitika sang Pilipinas.
