Ginpanindugan sang gobernador sa Negros Occidental nga ginarequire nila ang S-PASS bangod nagaside ang mga ini sa cautions.
Suno kay Negros Occidental Governor Eugenio Jose “Bong” Lacson, may kaugalingon nga Executive Order (EO) ang probinsya sang Negros Occidental kag wala ini sang ideya sa kinatuhay sa EO sang syudad sang Bacolod.
Madumduman nga sang tinalikdan nga adlaw, kapin 21 ka mga Bacolodnon ang wala makabyahe balik sa syudad matapos nga wala ang mga ini ginpasakay sang isa ka airlines sa panindugan nga required sa probinsya ang RT-PCR test.
Bangod sini nagrebook nalang ang mga Bacolodnon sang ila nga mga flights.
Nahibaluan nga sa ginpagwa nga EO No. 53 ni Bacolod City Mayor Evelio Leonardia, nakabutang nga indi na required sa Bacolod City ang S-PASS kag vaccination card nalang ang ginapangayo sa mga fully vaccinated indibidwal.
Suno kay Lacson, sa probinsya, nagarequire sila sang SPASS.
Dugang pa sini nga kun wala pa nabakunahan sa COVID-19 vaccine ang byahero, kinahanglan gihapon ang mga ini nga magpresent sang negatibo nga RT-PCR test.
Pahanumdom ni Lacson nga bisan manubo na ang kaso sang COVID-19, nagapabilin gihapon ang virus gani ang probinsya ang nagapabilin man nga nagaside sa paghalong.
Wala paman sa karun nagsulod sa pinsar sang probinsya nga dulaon ang S-PASS.
Panindugan sang gobernador nga ang SPASS ang pamaagi man agud mapanugyan sa mga Negrense nga magpabakuna.
Suno diri kun kuhaon ang SPASS, indi madeterminar ang kinalain sang nabakunahan kag wala nabakunahan.
Pahanumdom sini nga padayun ang paghalong sang probinsya ilabi na nga nagahilapit ang christmas season kag yara ang risgo sa pagsaka sang kaso sang COVID-19.
Kalakip na sa ginahalungan amo ang mga nagasulod nga mga negrense sa probinsya, gani ginalantaw ni Lacson nga ang airlines ang mahimo nagasunod nalang sa kun ano ang protocol sang probinsya.
Nagapati ini nga nakita man sang airlines nga ang protocol ang ginhuman bilang precaution.
