Makaligad ang 21 ka tuig humalin sang ini ang nag-operate, nabaton na gid man sang Bacolod City College ang Institutional Recognition nagikan sa Commission on Higher Education.
Ang Institutional Recognition ang gindaho sa mga tiglawas sang Bacolod City government kadungan sang Gawad Parangal rites nga ginpatigayon sa ciudad sang Iloilo kahapon kun sa diin nakabaton man sini ang La Carlota City College, Iloilo City Community College, kag Passi City College.
Sa interview sang Bombo Radyo kay Bacolod City Councilor Renecito Novero, chairman sang committee on education sa Sangguniang Panlungsod nga amo man ang nagtiglawas kay Mayor Evelio Leonardia, ginakilala na sang CHED ang tanan nga degree programs nga ginatanyag sa BCC, mahatagan sang special order ang mga graduates, kag ginakilala na sang iban nga pungsod ang diploma sang mga nag-eskwela diri.
Bangud sini, may sense of security na ang mga estudyante nga kilalahon sang employer ang ila nga diploma bisan diin man nga bahin sang kalibutan.
Retroactive naman ang Institutional Recognition gani ang mga naggraduate halin sang nagsugod ang BCC sang tuig 2000 ang may kaangay sini nga pagkilala.
Suno kay Novero, naglabay sa maid-id nga proseso ang paghatag sang Institutional Recognition sa BCC gani nagapasalamat ini sa pamunuan kag faculty sang eskwelahan kag sa mga city officials nga nag-apruba sang ordinansa nga nagrevise sang charter sang city college agud nga maka-avail ang mga estudyante sang libre nga tuition sa idalom sang Free Tertiary Education Act.
Nagdangat na sa malapit 13,000 ang kabug-usan nga mga estudyante nga nakatapos sa Bacolod City College nga ginhatagan na sang Commission on Higher Education sang Institutional Recognition makaligad ang 21 ka tuig.
Ang BCC ang gintukod paagi sa virtue sang City Ordinance No. 175 Series of 1997 sa idalom sang una nga termino ni Mayor Evelio Leonardia bilang alkalde kasunod sang ordinansa nga gin-author ni City Councilor Renecito Novero nga amo man ang chairman sadto sang committee on education sa Sangguniang Panlungsod.
Suno kay Novero, natabuan man nga siya ang chairman sang committee on education kag si Leonardia man ang alkalde sang ginduso ang ordinansa nga naga-amend sa charter sang BCC agud nga maka-avail sang libre nga tuition ang mga estudyante.
Nagsugod ang BCC nga may 300 ka mga estudyante apang nagadangat na sa karon sa 3,000 ang enrollees diri.
Suno kay Novero, maayo ang rekord sang BCC ilabi na sa licensure examinations kun sa diin may mga graduates nga nagasulod sa Top 10 sang mga pasinawan.
Ginpatukod ang BCC suno sa konsehal bangud madamo ang mga high school graduates nga indi makapadayon sa kolehiyo bangud sa kamahal sang tuition sa mga unibersidad.
May mga tinuig suno kay Novero nga ginbaton ang mga estudyante nagikan sa out of town sa BCC apang nagbalik na sa karon ang daan nga policy nga dapat taga-Bacolod gid ang nagaeskwela diri, ilabi na nga libre na ang tuition.
