Ginpanubuan na sa 60 porsyento sang orihinal nga ginhatag nga target nga mabakunahan sa Probinsya sang Negros Occidental para sa tatlo ka adlaw nga National Vaccination Days sumugod subong nga adlaw Nobyembre 29 tubtob Desyembre 1.
Suno kay Negros Occidental Governor Eugenio Jose “Bong” Lacson, ang mga Negrosanon ang wala pa makapabakuna sa COVID-19 vaccine ang magpadulong lang sa mga vaccination centers sang tagsa ka local government unit (LGU).
Paathag sang gobernador nga ang tatlo ka adlaw nga National Vaccination Days ukon “Bayanihan Bakunahan” ang programa sang National Government gani naghatag man sila sang target sa tagsa ka LGU.
Suno kay Lacson sa meeting kaupod kay Department of the Interior and Local Government (DILG) Secretary Eduardo Año, ginpakita sang presidente sang League of Provinces ang mataas nga target para sa vaccination sa bilog nga pungsod.
Bangod sini, nadesisyunan nga panubuon ang target kun sa diin kahapon ang anay 15 million nga target sang Pilipinas para sa tatlo ka adlaw nga National Vaccination Days ang ginpanubo nalang sa 9 million.
Apisar nga nagnubo na sa 60 porsyento sa orihinal nga target, aminado si Lacson nga challenging ini gihapon para sa probinsya.
Apang pahanumdom man sang gobernador nga indi lang dapat magfocus ang Negros Occidental sa tatlo ka adlaw nga “Bayanihan Bakunahan” kundi magfocus sa adlawan nga vaccination programs.
Ini bangod nagapati ang gobernador nga ang mahimo sa tatlo ka adlaw nga “Bayanihan Bakunahan” ang sarang man nga malab-ot sa adlawan nga pagbakuna.
Paathag man ni Lacson nga responsibilidad na sang mga LGU ang pagpahibalo sa ila nga mga constituents sa National Vaccination Days nga magasugod subong nga adlaw.
Panugyan naman sini nga hingalitan samtang may-available pa nga bakuna sa probinsya.
Pasalig naman sang gobernador nga tinguhaan nila nga indi mauyang ang preparasyon sang probinsya sa pag-upod sa programa sang National Government.
Sa pagpartisipar sang probinsya, ginbahin-bahin naman ang mga COVID-19 vaccine sa nagkalainlain nga LGU sa Negros Occidental.
