Patay ang isa ka tricycle driver nga may sablag sa lawas matapos gintiro sang wala nakilala nga lalaki nga iya nabais malapit sa isa ka supermarket sa Barangay Estefania, ciudad sang Bacolod kaina sang aga.
Ang biktima ang ginkilala kay Raymund Tortillos, 44-anyos, kag residente sang Purok Bagong Silang, Barangay Estefania.
Suno kay Police Major Ritchie Gohee, station commander sang Bacolod Police Station 4, nagsabtanay si Tortillos kag ang suspetsado sa gwa sang Savemore Fortune Towne.
Nakadul-ong pa si Tortillos sang pasahero sa Camelot Residences apang ginsundan ini sang suspetsado nga nagasakay sa motorsiklo.
Matapos maglagsanay, nakalab-ot si Tortillos sa vulcanizing shop sa Villa Alexandria, Barangay Estefania apang diri na ini nalab-ot sang suspetsado.
Mangayo kuntani si Tortillos sang tabang sa vulcanizing shop apang gintiro ini sang suspetsado sa likod nga gintunaan sang iya kamatayon.
Narekober sa crime scene ang tatlo ka empty shells sang caliber .9mm pistol.
Gilayon naman nga nagpalagyo ang suspetsado.
Suno kay Gohee, ginpadulungan nila ang bangkay sang suspect apang wala na ini didto.
May lead naman ang kapulisan bangud may mga witness nga nakakilala sa suspetsado.
Sa interview sang Bombo Radyo sa witness nga si Amparo Sitchon, nagasuksok sang face mask ang suspetsado kag indi niya ini kilala.
Suno kay Sitchon, gintiro liwat sang suspetsado si Tortillos maka-tatlo ka beses sang natumba na ini gani siya ang ginbawian sang kabuhi.
Si Tortillos ang may sablag sa iya nga panglakat kag nagabaligya sang prutas kun wala siya nagabyahe sang tricycle.
