Nakahunong na sa Cadiz City Police Station ang suspetsado nga nagpalupok sang armas-luthang nga gintunaan sang kamatayon sang isa ka tuig kag napulo ka bulan nga bata nga babayi sa Sitio Aluyan, Barangay Caduhaan, ciudad sang Cadiz, Domingo sang hapon.
Ginkilala ang suspetsado kay Nomar Ian Berto, pumuluyo sang Sitio Sicaba Monte, Barangay Caduhaan sang nasambit nga barangay.
Sa interview sang Bombo Radyo Bacolod kay Police Lieutenant Alfonso Precia, deputy chief sang Cadiz City Police Station, boluntaryo nga nagsungka si Berto sa mga kapulisan kag gintuad sini nga nagpalupok siya sang .45 caliber pistol nga wala sang rason kag wala sini natalupangdan nga ang bala ang nagtupa sa dingding sang puluy-an sang biktima kun sa diin naigo sang bala ang ulo sang bata.
Magapasaka naman ang pamilya sang biktima sang kaso batok sa suspetsado kag posible nga magapangatubang sa kaso nga reckless imprudence resulting to homicide.
Ginpahayag man ni Precia nga nakainom ang suspetsado kag wala man ini sang malain nga record sa barangay kasubong man sa Cadiz City Police Station.
