34 ka mga Punong Barangay kag 38 ka mga Sangguniang Kabataan Chairpersons sa Bacolod City ang nagpahayag na sang pagsuporta kay Lone District Congressman Greg Gasataya sa re-election bid bilang kongresista sa palaabuton nga 2022 elections.
Ini sa pihak sang indi paghangpanay sang kongresista kag sa anay partido sini nga Grupo Progreso ilabi na kay Bacolod City Mayor Evelio “Bing” Leonardia.
Madumduman nga una na nagpahayag ang alkalde nga wala na nagapati ang grupo Progreso sa pagdeklarar ni Gasataya nga neutral candidate, bangod nagapati ang mga ini nga sa pihak sang kompirmasyon may ara ini gihapon sang ginadampigan.
Sa pihak nga bahin, nangin hugot naman sa panindugan ang si Gasataya nga siya ang neutral apang bukas sa mga luyag magsuporta sa iya.
Suno kay Congressman Greg Gasataya, sadto paman masami na ini nga nagapatawag sang fellowship dinner kaupod sang mga opsiyales sang tagsa ka local government unit (LGU).
Kun sa diin sa ila nangin paghinun-anon, personal mismo nga ginpahayag sang mga opisyal ang ila pagsuporta, samtang ang iban naman nga wala nakatambong ang nagpahayag man pinaagi sa pagpadala sang mensahe.
Madumduman nga ang Bacolod City ang ginabug-usan sang 61 ka mga Barangay, gani masobra sa tunga sini ang nagpasalig na sang pagsuporta sa kongesista apisar sa indi maayo nga relasyon sini sa incumbent mayor.
Mas madamo naman nga SK Chairman ang nagpabutyag sang pagsuporta kag iban sa mga ini ang nagseparar sa panindugan sang Punong Barangay.
