Ginpasalig sang Provincial Director sang Department of Trade and Industry – Negros Occidental nga padayun ang ila nga pagmonitor sa presyo sang produkto nga nagatiyog sa kumunidad.
Subong nga adlaw natalana nga ideklarar sang Negros Occidental Government ang pagpaidalum sang bilog nga probinsya sa State of Calamity.
Suno kay Rachel Nufable, ang mga lugar nga napaidalum sa state of calamity ang dapat nakaprize freeze.
Ginakasubo man sini nga bangod sa pagpanghalit sang bagyo Odette, madamo sang mga negosyante sa Negros Occidental ang naapektuhan ilabi na sa pagkadula sang kuryente.
Sa karun indi pa matipon sang ahensya ang kabug-usan nga numero sang mga apektado nga negosyo bangod nagakadula ang kumunikasyon.
Apisar nga madamo sang kahalitan sa propidad, ginapakamaayo naman sini nga wala sang mga napatay maykaangtanan sa pagkaguba sang mga pasilidad.
Dako naman ini nga pagpanghangkat ilabi na nga ang sektor sang negosyo ang halos wala pa makarecover sa epekto sang pandemya, apang nagdugang pa diri ang bagyo.
Ginapangabay ni Nofable nga pinaagi sa eksperyensya, mas mangin resilient pa ang probinsya sa pag-address sa kaangay nga kalamidad.
Nagapangita man ang mga ini sang sang mga pamaagi agud nga malab-ot ang bulig sa mga apektado nga business establishment.
Santo sa partial monitoring, nagadangat sa 8 mil ang mga apektado nga negosyo sa 6th district sang Negros Occidental.
Sa pihak nga bahin, padayun gihapon ang pagmonitor sang DTI sa mga baligyaan natuhoy sa presyo sang mga produkto.
Sa pagpatigayon sang price freeze, seguruhon man sang mga ini nga nagakasunod ang Suggested Retail Price (SRP).
Suno diri sa tion sang price freeze indi na mahimo nga maglapaw sa SRP ang presyo sang mga produkto kaangay nalang sa presyo sang Generator sets, nga bangod sa pagsaka sang demand karun nga wala sang kuryente, masobra katunga naman sang orihinal nga presyo ang ginsaka.
