Yara sa P11.9 million ang estimated damages gikan sa 61 ka mga accomodation establishment sa Sipalay City, Negros Occidental sa ulihi nga data sang Desyembre 23.
Suno kay Jeck Lacson, Tourism Officer sa Sipalay City, tubtob sa karun, mabudlay pa sa ila nga iproseso ang hinali nalang nga hitabo.
Ini na ang ginalantaw nga pinakadako nga natural calamity nga naghalit sa syudad sang Sipalay.
Suno kay Lacson, pagpanghangkat karun sa syudad kun paano makabangon kag mabawi ang mga nangin kapierdihan.
Hugot naman nga nagalaom ang Sipalay City Government nga masarangan nila ang gilayon nga makabangon.
Suno kay Lacson, 11 ka mga Barangay sa Sipalay City ang may mga accomodation establishments, kaangay sang resorts, pension houses, inn kasubong man ang mga mountain resorts.
Apang bangod sa bagyo Odette may-ara nga bahin sang beach area nga nadeform ang itsura nga kaangay nga ginpalid sang hangin dala sang bagyo.
Dugang pa sang Tourism Officer nga madamo man sang mga debris nga nagtipon sa mga baybayon, nga ginakinahanglan pa nga matinluan.
Ginalauman man ni Lacson nga sa masunod nga tuig, madamo ang liwat na nga makabukas sa mga accomodation establishment kasubong man magabukas na ang tourism industry.
Panugyan sini nga may facebook page ang tourism office sang Sipalay City nga naga-update natuhoy sa travel guidelines sang syudad para sa mga turista.
Nakabutang man sa fb page kun ano nga mga accomodation establishment ang naga-operar kasubong man ang ila mga contact numbers.
Sa pihak nga bahin, nagnubo man ang nagakakuha nga isda sa syudad ilabi na nga madamo sa mga fishing boat ang nagkalaguba bangod kay bagyo Odette.
Isa pa sa rasun sang limitado nga makuha nga isda amo ang kawala sang nagakaigo nga storage facility bangod brown out.
Pasalig naman ni Lacson nga nakamonitor ang Department of Trade and Industry (DTI) sa presyo sang mga balaklon.
Sa karun nagapabilin nga wala pa sang direct electricity gikan sa National Grid Corporation of the Philippines (NGCP) kag masami generator sets lang ang gamit sa palibot.
May mga naplastar man nga community charging station kag may mga naga-offer man sang ila personal nga generator sets sa mga luyag magcharge.
Santo sa monitoring sang Department of Tourism, wala sang nastranded nga foreign tourist sa Sipalay City samtang ang mga local tourist naman ang gilayon man nga nakapauli matapos magbukas ang mga dalanon.
