Wala sang narecord nga naigo sang stray bullets ukon iligal nga pagpalupok sang armas ang Police Regional Office 6 sa bilog nga Western Visayas humalin sang Desyembre 16 tubtob 24, kadungan pa sang pagnubo sang total crime incidents sa nasambit nga period.
Suno kay P/Lt.Col Arnel Solis, spokesperson sa PRO6, isa lang ang narecord nga firecracker-related incident sa Western Visayas humalin sang Desyembre 16 tubtob 24.
Ang total crime incident sa nasambit nga period ang yara lang sa 472 ka mga kaso.
Ini ang 16.9 percent nga mas manubo sang 97 ka insidente sangsa crime incident nga nagluntad sang Desyembre 16 tubtob 24, 2020.
Pahayag ni Solis nga ginabantayan nila ang focused crimes kaangay sang murder, homecide, physical injury, rape, theft, robbery kag carnapping.
Ginpasalamatan man sang tagpamaba sa PRO 6 ang mga unit commanders nga yara sa mga estasyon, sa ila nga madasig nga general assessments kag strategic deployment sang mga personnels.
Ilabi na sa mga gin-identify nga mga strategic areas kaangay sang simbahan, malls, markets, terminal kag iban pa nga lugar nga masami ginadugok sang tawo.
Ginpasalamatan man ni Solis ang suporta sang mga force multipliers, barangay officials, local government units kag iban pa nga mga ahensya.
Paathag sini nga wala nahuman ang malinong kag may katawhayan nga paskwa kun wala ini nila ginbululigan.
Ginpasalamatan man ni Solis ang media, sa bahin sang radyo, telebisyon, print kasubong man ang social media, nga nagbulig natuhoy sa awareness efforts agud nga mas maghalong pa ang mga pumuluyo, ilabi na sa mga panugyan agud malikawan ang mga krimen.
Nagtamyaw man ini bilang tagpamaba sang ahensya sang “Merry Christmas” sa bilog nga Western Visayas ilabi na sa probinsya sang Negros Occidental kag syudad sang Bacolod.
Sa nagahilapit nga new year, pangamuyo naman sini nga maselebrar ang okasyon nga malinong kag may katawhayan.
