Iga-extend sang apat ka bulan ang kontrata sang IPM Construction and Development Corporation sa paghakot sang basura sa Bacolod City.
Sa interview sang Bombo Radyo kay Councilor Dindo Ramos, chairman sang Committee on Laws and Ordinances sa Sangguniang Panlungsod, maga-expire na kuntani ang kontrata sang IPM Construction and Development Corporation sa katapusan sang Disyembre apang ila ini nga igaextend tubtob sa Abril agud mahatagan sang tion ang biddling para sa masunod nga tuig.
Suno kay Ramos, ini bangud Disyembre na naaprubahan ang budget.
Suno sa iya, ginapahanugutan man sang layi ang extension sang kontrata kag magapabilin lamang ang rate sini kada bulan.
Nagahingyo man ini sa kumpaniya nga himuon ang ila obligasyon sa idalum sang kontrata kag klaruhon ang mga ginapangayo sang mga pumuluyo.
Gina-engganyo man sang konsehal ang iban pa gid nga korporasyn nga makigbahin sang bidding para sa masunod nga tuig agud ila makonsiderar kun may mas manubo nga rate para sa pagpanghakot sang basura sa ciudad.
