Mas mataas sang kapin 13 porsyento ang insidente sang sunog nga nagluntad sa Negros Occidental sang tuig 2021 kun ikumparar sa 2020.
Sa interview sang Bombo Radyo kay Provincial Fire Marshall Chief Inspector Kim Celisio, sa karun tubtob pa lamang sa Nobyembre ang data nga may yara sila bangud padayon pa ang ila assessment sa bulan sang Disyembre.
Suno diri, nagnubo ang mga insidente sang sunog sa mga structural ukon mga balay kag bodega kun sa diin sang 2020, nagdangat sa 233 ang narekord samtang as of November 2021, yara lamang ini sang 214.
162 naman ka mga residential fire incidents ang nagluntad sang 2020 samtang 103 sini nga tuig.
Suno sa iya, sa kabilugan, nagtaas sila sang 13 percent sa kabilugan nga sunog.
Suno diri, nagapost sila sang mga panugyan sa mga pumuluyo paagi sa social media.
Ginakasubo man sini ang mga narekord nga fatalities sang Disyembre kag nagapangabay sang maayo kag responsable nga paggamit sang kalayo.
Sa pihak nga bahin, ginakalipay ni Celision nga na-enact na ang Modernization Law sa Bureau of Fire Protection kag ginalauman ang madugangan ang mga personnel, ang ila training kag mga equipments agud mas mangin epektibo ang serbisyo sang BFP sa publiko.
Nagpanugyan ini sa mga pumuluyo nga mangin vigilante kag responsible sa tanan nga tinion.
