Recovered na sang makapauli sa Bacolod City ang 38 anyos nga lalaki nga Overseas Filipino Worker (OFW) sang tinalikdan nga Disyembre 31 nga nagpositibo sa Omicron variant.
Sa kumpirmasyon ni Emergency Operation Center (EOC) Executive Director Em Ang, ginpahayag sini nga nag-ayo na ang seafarer sang mag-abot ini sa Bacolod City bangod natapos na sini ang 14 days quarantine humalin sang nag-abot ini sa Metro Manila sang Disyembre 15.
Pagpahayag ni Ang nga sang Enero 2 lamang ginpagwa sang Philippine Genome Center ang genome sequencing sang OFW kon sa diin nag-ayo na ang pasyente.
Apang ginklaro ni Ang nga bilang kabahin sang COVID-19 protocol gilayon man nga nagcontact trace ang EOC kag gin-swab gilayon ang asawa sang seafarer nga amo lang ang naka close-contact sini.
Nahibaluan nga ang seafarer nga nagatrabaho sa isa ka cruise ship nga nakabase sa Florida, USA ang asymptomatic, natublukan na sang COVID vaccine kag nakabaton naman sang booster shot.
Kagab-i, naggwa ang resulta sang repeat test sang OFW kag positibo ini gihapon sa COVID.
Bangud sini, magapaidalom pa ang OFW sa pito ka adlaw nga quarantine.
