Nagdangat na sa 1.1 million ang nabakunahan sang at least 1st dose sang COVID-19 vaccine sa Negros Occidental apang masobra 700,000 pa ang kinahanglan lagson sang probinsya para malab-ot ang herd immunity sa Pebrero.
Madumduman nga ang Negros Occidental ang may pinakamanubo nga porsyento sang nabakunahan sa Western Visayas sang Oktobre 2021, kun sa diin nagpasalig si Governor Eugenio Jose “Bong” Lacson nga malab-ot sang probinsya ang 70 porsyento nga herd immunity sa Pebrero 2022.
Nahibaluan nga 1,821,370 ang 70 porsyento nga target population sang probinsya agud malab-ot ang herd immunity kag sa data as of January 2, 2022, ang probinsya ang nakabakuna na sa 1,111,083 ukon 60.7 percent sang target.
Sa karun, may 714,287 pa nga dapat mabakunahan ang probinsya agud malab-ot ang target nga herd immunity sa Pebrero.
Sa pihak nga bahin, may walo naman ka mga local government units (LGU) sa probinsya nga nakalapaw na sa ila target nga 70 porsyento sang populasyon.
Ini ang ginalakipan sang 112.03 percent sa La Carlota City, 97.78 percent sa Murcia, 76.18 percent sa Sagay City, 75.82 percent sa Talisay City, 75.73 percent sa Cadiz City, 75.44 percent sa Victorias City, 75.29 percent sa EB Magalona kag 73.43 percent sa Pulupandan.
Samtang ang mga banwa sang Calatrava, Moises Padilla, Toboso, Manapla, Cauayan, La Castellana, Isabela, Hinobaan, Hinigaran kag mga syudad sang San Carlos kag Sipalay ang wala pa gihapon makalab-ot sa 50 porsyento sang target.
