Nagpahanumdom naman si Negros Occidental Provincial Administrator Atty Rayfrando Diaz nga bisan wala pa sang kaso sang Omicron variant sa Negros Occidental, indi gihapon dapat nga magpakampante ang mga Negrosanon.
Balantayan naman suno sa Provincial Administrator ang una nga duha ka semana sang 2022 bangod madamo sang pagtipon-tipon sa Holiday Season.
Ginakahangaw-an suno diri nga ang mga pagtililipon sang mga pumuluyo kaangay sa mall kag iban pa nga public places ang magaresulta sang pagsaka sang kaso sang COVID-19.
Sa karun, naganubo naman ang kaso sa probinsya kun sa diin isa nalang ka COVID hospital gikan sa tatlo ang nagapadayun sa pagcater sang severe case sang COVID-19 kag isa nalang ang COVID patient nga naka-admit sa Cadiz City District Hospital.
Samtang wala naman sa karun sang nakaquarantine sa mga quarantine facilities sa Silay City kag EB Magalona kag ang mga doktor kag nurses nga assigned diri ang igabalik na sa normal nga hospital functions.
kahapon, yara nalang sa 176 ang nabilin nga aktibo nga kaso sa Negros Occidental.
