Liwat nga nagdangat sa 50 ang panibag-o nga kaso sang COVID-19 nga narecord kahapon.
Suno kay Bacolod City Emergency Operation Center Executive Director Em Ang, liwat naman nga nagasaka ang COVID-19 cases sa Bacolod City kasunod sang holiday period nga sa madumduman yara nalang kuntani sa single digit.
Dugang pa ni Ang nga 20 sa mga nagbyahe pasulod sa Bacolod City kahapon ang nagpositibo sa COVID-19.
Pasalig sang Executive Director sa EOC nga ginapaidalum nila sa rapid test ang mga naga-abot sa seaports kag airports nga gikan sa mga alert level 3 areas partikular na sa Metro Manila.
Ini ang santo naman sa mando ni Bacolod City Mayor Evelio “Bing” Leonardia nga estriktuhan ang mga border controls ilabi na nga may surge sa Metro Manila kag iban pa nga mga lugar.
Paathag ni Ang nga sa masami, kun magsurge ang COVID infection sa Metro Manila nagadangat man ini gilayon sa mga probinsya gani ginaseguro sang siyudad nga mapaidalum sa nagakaigo nga screening ang tanan nga mga naga-abot sa Bacolod City.
Ang 20 nga mga nagpositibo pinaagi sa Rapid test ang lunsay mga gikan sa Manila ukon Iloilo kun sa diin kabahin diri ang isa ka pamilya.
Ginakasubo man ni Ang nga bisan nagarequire sang RT-PCR test antes ang pagbyahe, may mga makalusot gihapon kun sa diin sang damlag lang, 12 gikan sa 18 ka mga real estate employees ang natukiban nga positibo sa virus.
Panindugan naman sini nag ang mga wala sang masumiter nga requirements ang pabalikon gilayon sa place of origin.
Suno kay Ang, nakapatigayon na sila sang koordinasyon kaupod ang mga shipping lines, Maritime Industry Authority (MARINA) kasubong man sa Philippine Coast Guard (PCG).
Ginpaathag man sini nga ang molecular laboratory na ang nagadesisyon sa ginapadala nga specimen sample sa Philippine Genome Center para sa Genome Sequencing.
Ini santo sa ila nga ginalantaw nga parameters kaangay sa mataas nga viral load ukon pagnubo sang cycle treshold value
Sa pihak nga bahin, ginpaathag man ni Ang nga ang mga authorized person outside of residence (APOR) nga fully vaccinated ilabi na ang mga may official business ukon official travel ang mapahanugutan lang nga magbyahe kag indi na igarequire sang swab test.
Apang sa karun, paathag ni Ang nga tinutuyo sang EOC nga magsulat sang apelasyon sa National Inter-Agency Task Force (NIATF) nga irequire na sa tanan nga magagikan sa Alert Level 3 ang negatibo nga RT-PCR test result.
