Natigayon na ang turn over of command ceremony kahapon sang mga Provincial Director sang Philippine National Police sa tatlo ka mga probinsya sa Camp General Martin Teofilo Delgado sa Fort San Pedro, Iloilo City.
Suno kay P/Lt Col Arnel Solis, tagpamaba sa Police Regional Office 6, ang mga nakigbahin sa seremonya ang ginalakipan kuntani sang apat ka PNP Provincial Office Director partikular na ang Guimaras, Antique, Iloilo kag Negros Occidental.
Apang wala makatambong ang incoming Provincial Director sa Antique gani wala man matigayon ang turn over of command ceremony.
Suno kay Solis ang effectivity sang reshuffling sang mga provincial directors ang nag-umpisa sang Enero 8 apang kahapon lang natigayon ang turn over of command ceremony.
Si Negros Occidental Police Provincial Office (NOCPPO) Director P/Col Romy Palgue ang ginbuslan na ni P/Col Leo Pamitan nga anay Provincial Director sa Capiz PNP.
Samtang ginbuslan naman ni P/Col. Adrian Acollador si P/Col. Gilbert Gorero sa Iloilo PNP.
Si P/Col. Richard Baluis naman ang panibag-o nga naassign nga provincial director sa Guimaras PNP.
Suno kay Solis si P/Col Alexander Mariano naman ang panibag-o nga magapungko bilang Provincial Director sa Antique PNP.
Masaligan naman suno sa tagpamaba nga igapadayun sang mga natungdan ang mga operasyon sang mga nauna nga Provincial Directors kag kadungan sini magalunsyar sang mga panibag-o nga mga plano.
Sa kaangot nga balita, ginpakigbahin man ni PRO 6 spokesperson Police Lt. Col. Arnel Solis nga ang bag-o nga NOCPPO Director nga si P/Col Leo Pamitan ang graduate sa Philippine National Police Academy (PNPA) Class of 1998.
Si Pamitan ang tumandok sa Cagayan kag kalabanan sa career sini ang didto man sa Region 2.
Ini ang nangin Regional Training Director man sa nasambit nga Rehiyon.
Ulihi ini nga na-assign bilang Area Police Command sa Northern Luzon sa bahin sang Personnel and Record Management Division.
Sa pihak nga bahin, nagpasalig naman si P/Col Leo Pamitan nga buhaton sini ang iya nga responsibilidad kag obligasyon sa pagserbe sa mga pumuluyo sa Negros Occidental.
Pahayag man sini nga padayunon niya ang mga proyekto sa anay Provincial Director.
Suno kay Pamitan, nakahanda naman ini sa pagpanghangkat dala sa panibag-o sini nga designation.
Aminado naman ini nga kulang pa ang iya nga mga accomplishments gani dako ang pagpasalamat sang opsiyal nga ginhatag siya sang oportunidad nga magserbe sa probinsya.
Pasalig man sini nga seguruhon nila ang pagpatuman sang layi kag kalinong ilabi na sa nagahilapit nga 2022 National and Local Elections.
Sa pihak nga bahin gindesignar na bilang opisyal nga tagpamaba sang NOCPPO si P/Lt. Col Abegael Donasco nga anay amo ang deputy spokesperson sang Provincial Office sang PNP.
Si Donasco ang nagbulos na kay P/Lt Col Edison Garcia.
