Padayun nga gina-itemize sang investigator on case may kaangtanan sa mga naconfiscate nga kinawatan nga mga pagkabutang sang Aki Cuarda Robbery and Hold Up Group, agud mabalik sa matuod nga mga tag-iya.
Suno kay P/Capt Elmer Bonilla, Station Commander sa Bacolod Police Station 7, ang balay nga gin-arkilahan ni Arnold “Aki” Cuadra, nga ginkilala lider sang grupo ang ginturn-over na sa pamilya kasunod sang ginpatigayon nga pagsulod diri kahapon agud nga makumpiskar ang gina-alegar kinawatan nga mga pagkabutang.
Agud patas ang pag-imbestigar, paathag ni Bonilla nga nag-imbetar man sila sang mga katapo sang barangay kag media.
Ang mga stolen items ang gikan sa mga operasyon sang pagpangawat kag Akyat Bahay sang grupo ang gina-itemize na sang imkbestigador sang Bacolod Police Station 7.
Ang mga ginkawat nga pagkabutang ang igapadala naman sa tagsa ka mga Police Stations kun sa diin nagpablotter ang mga biktima.
Matapos mabatun ang mga pagkabutang, pahayag ni Bonilla nga kasunod na sini ang pagfile sang nagakaigo nga kaso.
Suno diri, pagahulatun naman ang court order antes ang pagturn over sa mga ginkawat nga pagkabutang.
Nasapwan sa balay ang mga naganilapta nga pagkabutang, kag indi pa matumod kun pila gikan sa mga ini ang kinawatan.
Nagpanawagan man si Bonilla sa mga Police Station sa Bacolod City nga kun may kaso sang robbery ukon akyat bahay, ipakig-angot ini sa Bacolod Police Station 7.
Kalakip sa mga nauna na nga may reklamo sang pagpangawat amo ang Bacolod Police Station 3, Bacolod Police Station 4, Bacolod Police Station 6 samtang ang Bacolod Police Station 7 naman ang naga-uyat sang kaso sang grupo.
Madumduman nga nasapwan nalang nga patay si Arnold “Aki” Cuadra Villa Angela Subdivision, Barangay Villamonte sang Enero 8, kag nasapwan man ang bangkay sang duha pa ka katapo sang grupo sa banwa sang Murcia kag isa ang nasapwan sa syudad sang Bago.
Ang notorius nga grupo ang madugay naman nga nagapangbiktima sa syudad sang Bacolod.
