Ginpahayag sang Punong Barangay sa Vista Alegre nga antes paman gingwardiyahan ang balay nga gina-arkilahan ni Arnold “Aki” Cuadra sa Regen Pearl Homes, Barangay Vista Alegre, nga may mga persona na nga nakasulod sa balay kag may bitbit nga sinako sang mga gamit sa paggwa.
Madumduman nga nasapwan nalang nga patay si Arnold “Aki” Cuadra Villa Angela Subdivision, Barangay Villamonte sang Enero 8, kag nasapwan man ang bangkay sang duha pa ka katapo sang grupo sa banwa sang Murcia kag isa ang nasapwan sa syudad sang Bago.// Si Arnold “Aki” Cuadra ang gina-alegar lider sang Aki Cuadra Robbery and Hold Up Group nga nagapangbiktima partikular na sa syudad sang Bacolod.
Kahapon gin patigayon ang pagbukas sa balay nga gina-arkilahan sang mga biktima, kaupod sang mga kapulisan gikan sa Bacolod Police Station 3, Bacolod Police Station 4, Bacolod Police Station 6 kag Bacolod Police Station 7 kag ang mga biktima sang pagpangawat nga nagpablotter sa nasambit nga mga Police Stations, agud nga tumuron kun kalakip ang ila nga mga gamit sa mga nabilin sa balay.
Sa sulod, nasapwan ang madamo nga mga bayo, mga branded nga mga sapatos, tool box kag iban pa nga mga kagamitan, kun sa diin may ara man sang mga complainant nga nagtuad nga nakilala nila ang ila nga mga gamit.
Suno kay Punong Barangay Jose Maria Leandro De Leon, antes paman ma gwardiyahan ang balay, may ara na sang mga una nga nagsulod diri.
Pahayag ni De Leon nga matapos sang pagkasapo sang mga bangkay, may nagtawag nga concerned citizen sa ila Barangay nga nagpahibalo nga may mga nagsulod sa balay kag nakadala sang sinako nga mga pagkabutang sa paggwa.
Gintinguhaan naman ini nga pakadtuan sang Barangay Tanod apang wala na ang mga ini sang nalab-utan.
Pahayag pa sini nga sa una nila nga pagpadulong sa lugar kasunod sang insidente, tuman ka gamo ang mga pagkabutang sa sulod, apang nakibot nalang sila nga sa ila pagbalik nahimos na ang mga ini.
Apang dugang pa sang Punong Barangay nga sa sunod nila nga pagbalik, liwat naman nga nagnilapta ang mga kagamitan, nga nagapakita lang nga may nagsulod na diri.
Kasunod sini, nagbutang na mismo sang mga Barangay Tanod agud nga maseguro nga wala na sang iban nga magatandog sa balay.
Kahapon sang aga, may mga nagpadulong man sa balay kag nagtaklas sa pader, apang wala madayun sang ginasita sang mga nakabantay nga tanod.
Ang mga persona ang nagpakilala nga taga-Barangay Sum-Ag kag magatsekyar sa balay agud matumod kun yara ang ila pagkabutang.
Gani gin-abisuhan nalang ang mga ini nga magbalik sa hapon bangod ginahulat pa ang iban nga complainant.
Bangod sa naganilapta ang mga kagamitan, indi naman matumod kun pila ka porsyento sa mga ini ang kinawatan.
