Ginpasalig sang alkalde sang banwa sang Pontevedra nga hatagan sang municipal government sang bulig ang pamilya Cordero sa Barangay Antipolo nga nadulaan sang mag-iloy matapos matumbahan sang truck nga nagakarga sang tubo kaina sang kaagahon.
Sa interview sang Bombo Radyo kay Mayor Jose Maria Alonso, halos lima ka oras antes nakuha ang lawas sang mag-iloy nga Ermie kag JR Cordero bangud natampukan gid ang ila balay.
Suno kay Alonso, nanghulam pa sang equipment agud nga maalsa ang tubo nga ginabanta nagabug-at sang 30 toneladas.
Ang 12-anyos naman nga anak nga babayi ang nakaluwas kag nabagrasan lang sa agtang bangud wala ini nalab-ot sang tubo.
Maswerte naman nga wala sa balay ang bana nga Cordero bangud sa Barangay Pandan ini nagtulog.
Bangud dulhugon kag likuon ang dalan sa lugar, gin-istorya sang alkalde ang mga pumuluyo kag nagpasugot man ang mga ini nga irelocate sa mas hilway nga lugar bangud pila na ka truck ang naaksidente diri.
Suno kay Alonso, amat-amaton ang pagrelocate sa mga residente agud nga malayo sila sa katalagman.
Kadungan sini, nagpanawagan ang chief executive sa mga driver sang truck nga indi mag-inom antes magmaneho kag indi man pagdal-on ang bata nga gamay kun nagabyahe bangud ginadumilian ini sang layi.
Magabulig man ang LGU sang Pontevedra sa pamilya Cordero angot sa kun ano ang ila nga plano batok sa driver sang truck nga si Henry Salgado.
