Aminado ang mga driver kag operator sang pampubliko nga salakyan sa probinsya sang Negros Occidental nga mabudlay ipatuman ang no vaccine, no ride policy pananglitan ipatuman ini sang Department of Transportation nationwide.
Suno sa DOTr, ang no vaccine, no ride policy ang magatake effect sa National Capital Region sa Lunes, Enero 17.
Sa interview sang Bombo Radyo kay Jessie Ortega, secretary-general sang Sentrong Samahan ng mga Tsuper at Operator sa Negros, mausisa sang driver ang pasahero kun may yara ini sang vaccine card ukon wala kun yara sa terminal.
Apang bangud madamo nga pasahero ang nagapapara lang sa higad sang dalan suno kay Ortega, mangin malawig ang pagpundo sang public utility vehicle bangud magakadto pa ang pasahero sa side sang driver agud ipakita ang iya vaccine card.
Ini ang magaresulta naman sa paggutok sang dalagan sang trapiko.
Kun sa terminal naman ang pag-usisa sang vaccine card, ang pasahero ang magasakay man gihapon sa pampubliko nga salakyan.
Suno kay Ortega, mabudlay ipatuman ang nasambit nga policy bangud wala man sang konduktor ang mga jeep kundi nagaisahanon lang ang driver.
Aminado man ang SSTONE secretary-general nga wala sang paagi ang driver agud nga masiguro nga indi peke ang vaccine card nga ginapakita sang pasahero. Samtanga, ginapaabot na sang Sentrong Samahan ng mga Tsuper at Operator sa Negros nga maganubo ang income sang mga driver sang pampubliko nga salakyan kun ipatuman sang Department of Transportation ang no vaccine, no ride policy nationwide.
Sa interview sang Bombo Radyo kay SSTONE secretary-general Jessie Ortega, mabuhinan ang numero sang mga pasahero bangud indi man tanan nga commuters ang vaccinated.
Suno kay Ortega, amat-amat na nga nagdamo ang numero sang mga pasahero subong gani makaluluoy naman ang mga driver kun magdiutay ang mga commuters.
Indi man patas suno kay Ortega ang patakaran sang gobyerno nga driver ang mabayad sang multa kun madakpan nga may unvaccinated passenger, santo sa nakabutang sa circular sang DOTr.
Ini nga policy suno kay Ortega ang isa ka sahi sang pag-ipit sa mga driver nga kabahin sang pigado nga sektor.
Suno sa SSTONE secretary-general, nagnubo na gid ang income sang mga driver subong bangud kada semana ang pagmahal sang presyo sang krudo kag sang gasolina.
Kun magtayuyon ang kapierdihan sang mga driver suno kay Ortega, madamo ang magauntat sa pagbyahe kag magabalik nalang sa kabanwahanan agud nga manguma.
Suno kay Ortega, kuntani indi nalang pag-ipatuman sang gobyerno ang nasambit nga polisa bangud wala man sang driver nga nalatnan sang pasahero sang virus bangud ginadaho man lang ang plete kag wala man nagaistoryahanay.
