112 ang panibag-o nga nadugang sa kaso sang probinsya sang Negros Occidental kahapon samtang 88 naman ang nadugang sa syudad sang Bacolod.
Ang panibag-o nga kaso sa probinsya ang ginalakipan sang 101 nga local cases, walo ka locally stranded individual (LSI) kag duha ang returning overseas Filiipino (ROF).
Samtang ang panibag-o nga kaso sa syudad sang Bacolod ang ginalakipan sang 87 ka local cases kag isa ka ROF.
Santo sa Department of Health Western Visayas, ang kabug-usan nga kaso sa rehiyon ang nagdangat na sa 151,572 samtang 6,678 naman sa karun ang aktibo nga kaso.
Ang Antique ang nakarecord sang 92 ka panibag-o nga kaso; 150 sa Capiz; 11 sa Guimaras; 84 sa Iloilo kag 282 sa Iloilo City.
Ang recoveries ang nagdangat na sa 140,115 samtang ang death toll ang nagapabilin sa 4,722.
Samtang yara sa 730 ang aktibo nga kaso sa syudad sang Bacolod kag 1,195 naman ang aktibo nga kaso sa probinsya sang Negros Occidental.
Suno sa executive director sang Emergency Operations Center sang Bacolod City, 80 porsyento sang mga positibo nga kaso sang COVID-19 humalin sang Enero 1, 2022 ang asymptomatic ukon mild lamang ang ginasuprer nga mga sintomas.
Suno kay Em Ang, apisar nga mas madamo ang nagakarekord nga kaso sang COVID-19 sini nga bulan kun ikumparar sang tinalikdan nga Disyembre, mild naman ang mga sintomas sini kaangay sang pag-ubo, pagsakit sang tutunlan kag ulo nga wala man nagaayo man gilayon pagkatapos sang duha ka adlaw.
Aminado ini nga nagakaalarma ini sa pagsaka sang kaso sa bilog nga pungsod apang sa Bacolod suno kay Ang, kontrolado sang gobyerno ang sitwasyon.
Suno sa iya, manubo man ang utilization rate sa mga ospital subong man ang fatalities sang virus.
May mga pasyente man nga ginadala sa ospital apang nagasuprer ang mga ini sang comorbidities kag indi tuman ka severe ang kondisyon kun ikumparar sa nagliligad nga mga surge.
35 ka mga specimen naman ang ginpadala sa Philippine Genome Center sang tinalikdan nga semana apang sa karun wala may nakagwa ang resulta.
