Ginakabig sang executive director sang Bacolod Emergency Operations Center nga maayo nga butang ang pagpa-idalum sang ciudad sa Alert Level 3 sa COVID-19 agud indi magpakampante ang mga pumuluyo.
Sa interview sang Bombo Radyo kay EOC Executive Director Em Ang, ginpahayag sini nga maayo nga gin-elevate na sa Alert Level 3 ang ciudad bilang kabahin sang preventive measure bangud kun yara lamang sa Alert Level 2 ukon mas manubo, nagakampante ang mga residente.
Suno sa iya, kun mahalog ang restrictions, makit-an nga wala na nagasuksok sang face mask ang mga yara sa mga purok.
Suno diri, kun Alert Level 3 ang status, mas conscious ang mga tawo kag sarang nga makabutang ang local government unit sang mga restrictions ilabi na sa inbound travel.
Kaangay na lamang suno kay Ang sa Manila, nga mataas ang kaso, gani makabulig ang mga restrictions agud malikawan nga magpadulong diri ang mga nagikan didto kag matapna ang pagsulod sang virus.
Gindugang man sini nga indi man mapilit ang mga pumuluyo nga magsumbit sa RT-PCR testing kun Alert Level 2 bangud wala sang legal basis kag daw kaangay na lamang nga wala sang mga restrictions indi kaangay sa Alert Level 3 nga sarang nga malimitahan ang transmission.
