Nagpagwa na sang pagsulundan natuhoy sa nakasugtan nga travel requirements ang syudad sang Bacolod pinaagi sa ginpagwa nga Executive Order No. 7 series of 2022 nga maga-umpisa Pebrero 1.
Ginpasalamatan ni Bacolod City Mayor Evelio “Bing” Leonardia, nga ginsugtan ni Negros Occidental Governor Eugenio Jose “Bong” Lacson nga mangin isa nalang ang travel requirements sang syudad kag probinsya bilang sabat sa pangabay sang mga pumuluyo.
Ini bangod sa kadamuon sang kaso sang COVID-19 sa Metro Manila, indi na macomply sang mga Molecular Laboratories ang pagpagwa sang RT-PCR test results sa madali nga tinion, nga nagaresulta agud maglapaw na sa 72 oras nga ginarequire sa pagbyahe.
Bangod sini, madamo sang mga pumuluyo nga magabyahe na kuntani pabalik sa syudad ang indi makasakay kag nagaparebook nalang sang byahe.
Paathag ni Leonardia nga magluwas sa ini ang tuman ka gasto ilabi na nga nagadangat sa P3,000 tubtob P5,000 ang balor sa RT-PCR testing, nagakaguba pa ang schedule sang mga byahero.
Nakita nila nga solusyon amo ang pagbatak sang negative RT-PCR test nga requirement kag ginbuslan ini sang Rapid Antigen testing nga mas madasig maggwa ang resulta kag nagadangat lang sa kapin P800.
Apang pahanumdom sang alkalde nga kinahanglan kuha sa DOH-Accredited Laboratory ang non-reactive Rapid Antigen Test result.
Ini bangod mahimo na sa karun nga makapatigayon sang rapid antigen testing bisan sa mga pamalay nalang.
Suno kay Leonardia, ang airlines na amo ang magatsekyar sang dokumento kag indi sang mga ini pasakyon ang mga wala sang resulta sang rapid antiden testing.
Dugang pa ni Leonardia nga antes magdesisyon si Lacson ang nagpangayo man sang abiso gikan kay La Carlota City Mayor Rex Jalandoon, nga isa man ka doktor kag ini ang nagpasalig nga ang rapid antigen test ang halos kaangay ang accuracy sa RT-PCR test.
Suno kay Leonardia, kasubong man ang nangin panindugan ni Dr. Chris Sorongon, deputy for medical sa Bacolod Emergency Operation Center (EOC), kun sa diin ang mga nagareactive sa rapid antigen test ang masami nga nagapositibo man sa RT-PCR test.
Ginapasalamatan ni Leonardia nga naaprubahan ang isa lang nga pagpatuman agud indi na maglibog ang ulo sang mga pumuluyo kaangay sa nakaligad nga lainlain ang mga pagsulundan.
