Ginahangkat sang Vice Mayor aspirant sa syudad sang Bacolod ang administrasyon kag mga law enforcement unit nga mangin patas sa ginapatigayon nga pagpangkakas sang mga campaign materials sang mga nagakandidato.
Suno kay Atty Ceasar Distrito, vice mayor aspirant sa grupo asenso, nagakakita na kun paano ginagamit ang puder sang yara sa administrasyon sa pamulitika.
Ini matapos nga makapila na ka beses nga ang ginapatigayon nga pagpamalos sang mga tarpaulin sang mga pulitiko sa Task Force Disiplina ang lunsay iya sang kontra partido.
Gindumdom man sini nga naumpisahan ini sang ginpamalos ang iya mga campaign materials sa Bacolod City Public Plaza sa panindugan nga ini ang iligal, apang ginakatingala sini nga wala ginhilabtan ang tarpaulin ni Vice Presidential Candidate Sara Duterte.
Suno kay Distrito, ginpalos lang ang tarpaulin ni Mayor Sara sang iya na ini nga gintumod.
Sang damlag lang, gin-operar man sang Task Force Disiplina ang pagpamalos sang mga tarpaulin sang Grupo Asenso sa pagpanguna sang kandidato sa pagka-alkalde nga si former Congressman Albee Benitez sa City Heights Subdivision sa Barangay Taculing.
Paathag ni Distrito nga pribado nga propidad ang subdivision kag ginpahanugutan sila sang Home Owners Association nga magtakod sang campaign materials sa entrance.
Panindugan sang kandidato nga wala sila sang violation bangod makabig ini nga freedom of expression.
Ginalantaw ni Distrito nga mahimo masakit sa panan-aw sang ila kasumpong nga makita ang ila nga mga lirato gani ginpangpalos sang mga ini nga nagapakita nga nagapangutos na ang administrasyon.
Dugang pa ni Distrito nga gindula naman sang korte suprema sa layi ang ginatawag premature campaign nga alegasyon sa ila.
Paathag ni Distrito, nga bangod gindula na ang layi batok sa premature campaign, mahimo lang ang mga ini nga makapaskil sang campaign materials samtang wala pa nagasugod ang campaign period.
Sa tion sang campaign period nahibaluan nga 2×3 feet lang ang size sang campaign materials nga mahimo mabutang sa mga campaign places, apang bisan ano nga sizes ang mahimo lang magamit sa mga pribado nga propidad.
Kwestyon naman sini nga magluwas sa ila, madamo man sang campaign materials sang Grupo Progreso nga nakapaskil sa mga poste apang wala man ginapalos.
Suno kay Distrito, ang nagakatabo ang maathag nga nagapakita nga may ara sang pinilian ang pagpatuman sang pagpamalos sang campaign materials.
Panawagan sini ang patas nga hampang natuhoy sa eleksyon.
