Masobra P700,000 nga balor sang illegal nga druga ang nakumpiskar sang Bacolod Police Station 8 sa Purok 13, Barangay Mandalagan, Bacolod City kagab-i.
Sa interview sang Bombo Radyo kay Police Major Joery Puerto, station commander sang Bacolod Police Station 8, ginkilala ang mga suspetsado sanday Jessie Masgong, 34 anyos, residente sang Barangay Tangub kag Christian Guinanao, 26 anyos, residente sang Barangay 20, Bacolod City.
Suno kay Puerto, si Masgong ang kabayo sang mga priso nga nagabaligya sang illegal nga druga kag si Guinanao amu ang collector ukon nagakuha sang proceeds.
Suno sa iya, nakuha sa ila paghinakop ang 21 tanan ka mga sachet sang suspected shabu, P500 bill, P10,000 ng boodle money kag iban pa nga drug paraphernalia.
Ang nakumpiskar nga illegal nga druga ang ginabanta nagabug-at 105 grams kag may estimated market value nga P714,000.00.
Sa karun nakahunong ang mga suspetsado sa Bacolod Police Station 8 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
