Ginkumpirmar sang hepe sa Hinigaran Municipal Police Station nga napasaka na sa korte ang kaso nga murder kay Constancio Canoy alyas JR angot sa kamatayon ni Police Corporal Nestor Madelo, samtang gintuad naman sang suspetsado nga ginhungod sini ang pagbunggo sang iya multicab.
Madumduman nga ginbilin ni Canoy ang bangkay sang pulis sa Barangay Pilar, banwa sang Hinigaran kasunod sang nagluntad nga aksidente sa Barangay Sum-Ag, Bacolod City samtang dala sini ang iya carry nga salakyan.
Suno kay Police Captain Ryan Villasario, ginpasaka ang kaso nga murder kay Canoy bangod ginapatihan sang mga kapulisan nga kasubong man sa resolusyon sang prosecuter, nga hungod ang natabo nga pagpatay sa biktima.
Madumduman sa resulta sang post mortem examination, nakita nga glass instrument ang rasun sa kamatayon sini kasunod sang aksidente.
Suno kay Villasario, may mga witness man nga nakakita sa Barangay Sum-ag nga madasig gilayon nga ginpaburhot ni Canoy ang salakyan matapos ang pagkabunggo sa truck padulong sa sur nga bahin sang probinsya.
Sa impormasyon sang mga kapulisan, ginapahayag nga gin-arkilahan ni P/Corp Madelo ang multicab ni Canoy sa balor P1,500.
Nagpadulong ang mga ini sa Bago City kag nagbulang, apang napierde ini gani wala nabayaran si Canoy.
Bangod sini, ginalantaw nga hungod nga ginbunggo sang suspetsado ang carry bangod sa kaakig sa pulis.
Apang suno kay Villasario, indi magamit sang korte, ang revelation sang suspetsado magluwas nalang kun ini ang maghuman sang affidavit.
Sa karun, wala sa gihapon marecover sang mga kapulisan ang ginapatihan 9mm pistol nga issued firearm sa pulis, bangod magazine nalang ang narecover malapit sa bangkay sang ini ang masapwan
