Nagapanawagan ang Imam sa Islamic community sa Barangay 31, Bacolod City nga mapasig ang imbestigasyon sa pagpatay sa lider sang Muslim community sa syudad sang Victorias sang Lunes.
Madumduman nga si Iksan Umpar, 35 anyos, kasado, residente sang Toreno Heights, Barangay 13, Victorias City ang hinali nalang nga ginpalapitan kag ginluthang sang wala makilala nga suspetsado sang ini ang pasakay na kuntani sa iya Fortuner nga salakyan kaupod ang iya asawa.
Suno kay Mona Calib, kilala sini ang biktima bangod masami ini nga nagabisita sa iya sa Islamic community sa Barangay 31 sang wala pa ang pandemya.
Ini ang nagabisita sa syudad agud magpamulong-pulong sa mga kaupod nga Muslim.
Nakilala sini si Umpar nga isa ka Diyosnon, hipuson kag mabuot nga persona.
Dugang pa sini nga masami lang nga negosyo ang gina-atubang sang biktima.
Panawagan ni Calib nga mapadasig ang pagsolbar sa kaso agud mahatagan man sang kahilwayan ang nabilin nga himata ni Umpar.
Nagapanawagan man ini sa mga mahimo nakasaksi sa insidente kag sa nakakilala sa suspetsado nga isugid sa mga kapulisan agud madasig nga masolbar ang kaso.
Nagahingyo man ini sa Victorias City Police Station, nga tinguhaan nga masolbar ang kaso sa labing madali nga tion.
