Gintutukan man sang mga pumuluyo sa ciudad sang Bacolod kag probinsya sang Negros Occidental ang presidential candidates forum nga ginpatigayon sang Kapisanan ng mga Brodkaster ng Pilipinas alas-9:00 sang aga tubtub alas-12:00 kaina sang udto.
Ginplastar sang lima ka presidential aspirants ang ila nga plataporma pananglitan nga sila ang madaog sa eleksyon nga patigayunon sa bulan sang Mayo.
Sa Panata sa Bayan: The KBP Presidential Candidates Forum,” ang mga aspirants ang ginhatagan sang tag-lima ka minutos agud iplastar ang una nga mga bagay ang ila himuon kun sila ang mapilian bilang presidente.
Nagpangko si Manila Mayor Isko Moreno Domagoso nga dugangan ang pondo para sa housing program kag ang pagtukod sang 107,000 hospital beds sa una nga 1,000 days sang iya pagpungko.
Si Senator Panfilo Lacson naman ang nagpahayag nga lagson sini ang incompetent, corrupt kag undisciplined government workers agud nga matapna ang corruption kag mamaximize ang resources sang Pilipinas.
Ginpangako man sini nga untaton ang importation mindset nga amo ang nagapatay sang local agriculture sector.
Suno naman kay Senador Manny Pacquiao, igaduso sini ang one-gadget-per-student ratio, kag ang renewable energy development.
Sa bahin naman ni Vice President Leni Robredo, ginpangako sini ang pagdoble sang pondo para sa agriculture sector agud masiguro ang food security, pagtrabaho para sa unemployment insurance; support for in-city, on city and near city housing program agud nga may access ang mga residente sa social services kag livelihood; kag paglagas sa big-time drug traffickers.
Ginpabutyag man sang bise presidente ang suporta sa modernization program sang Armed Forces of the Philippines.
Ginpahayag naman ni labor leader Leody de Guzman nga igarecover sang iya administrasyon ang ill-gotten wealth ni the late dictator Ferdinand Marcos kag sang iya nga pamilya, magpatuman sang 20 percent wealth tax sa top 500 richest Filipinos agud nga mapondohan ang social services para sa mga pumuluyo kag mabuligan ang agriculture sector nga mapadako ang ila produksyon.
Wala naman nakatambong sa forum si former senator Ferdinand “Bongbong” Marcos Jr. bangud conflict sa iya nga schedule.
