Padayon pa nga gina-imbestigaran sang Calatrava Municipal Police Station ang pagtiro-patay sa isa ka 21 anyos nga tapasero sa Purok Binabuyan, Sitio Magkatagak, Barangay Cambayobo, Calatrava, Negros Occidental.
Ginkilala ang biktima kay Jimmy Dela Cruz, 21 anyos kag temporaryo nga nagapuyo sa nasambit nga lugar apang residente sang Hacienda Conchita, Binalbagan, Negros Occidental.
Sa interview sang Bombo Radyo Bacolod kay Police Major Lumyaen Lidawan, hepe sang Calatrava Municipal Police Station, ginpahayag sini nga gintawag sa ila sang concerned citizen nga may yata sang nagluntad nga shooting incident sa Purok Binabuyan, Sitio Magkatagak, Barangay Cambayobo sa banwa sang Calatrava.
Suno kay Lidawan, santo sa ila nga natipon nga impormasyon may apat ka mga armado nga lalaki ang nagtiro sa biktima sang ini ang nagpanaug sa truck sang tubo.
Suno sa hepe ginatul-id pa nila sa karun kun ang may kahimuan sang krimen ang katapo sang CPP-NPA bangud wala sila sang konkreto nga ebidensya.
Ang biktima ang nagatrabaho sang karga tapas sang tubo kag may yara man ini sang upod nga duha ka iban pa sang natabo ang krimen.
Suno ang biktima ang may yara sang pending nga warrant of arrest sa paglapas sa RA 10591 sa syudad sang San Carlos, Negros Occidental.
Narekober sa crime scene ang isa ka cartrige sang M-16 kag Calibre 45.
Ginkumpirmar sang commander sang 79th Infantry Battallion sang Philippine Army nga ang tapasero sang tubo nga ginluthang sang apat ka gina-alegar New People’s Army (NPA) sa banwa sang Calatrava sang Biyernes, ang katapo man sang hublag apang luyag na nga magtiwalag sa grupo.
Suno kay Col. J-Jay Javines, ang biktima nga ginkilala kay Jimmy Dela Cruz, residente sa banwa sang Binalbagan, ang aktibo nga katapo sang napuhag na nga Northern Negros Front sang Communist Party of the Philippines – New People’s Army (CPP-NPA.
Ginalantaw ni Javines nga naglie-low na kuntani kag nagpanaog na gikan sa armado nga pagpakigbato ang biktima kun sa diin siya ang nagatrabaho na bilang tapasero sang tubo sa banwa sang Calatrava.
Apang paathag sini nga ang Northern Negros Front ang may doktrina kun sa diin ang mga magatiwalag sa ila ukon magapahuway ang mahimo nga patyon bilang penalidad.
Suno sa Army Commander, si Dela Cruz ang nahibaluan nga may pending warrant of arrest sa syudad sang San Carlos sa kaso nga Republic Act 10591 ukon Comprehensive Firearms and Ammunitions Regulations Act.
Paathag ni Javines nga kun may ginabuhat nga atrocities ang mga katapo sang Northern Negros Front, masami nga ginalakip man sa kaso ang mga katapo sini depende sa ginatuad sang witness.
Suno diri, si Dela Cruz ang kalakip sa gina-uyatan nila nga “Order of Battle” ukon ang listahan sang katapo sang mga makawala nga grupo.
Aminado man ang Army Commander nga madamo sang mga katapo sang Northern Negros Front nga naglie-low na apang nagapanago kag nahadlok nga magsungka sa gobyerno bangod sa pagpinsar nga sila ang sakiton sang militar ukon prisuhon.
Panawagan ni Javines sa mga katapo sang makawala nga grupo nga kun luyag na nila nga magpahuway sa armado nga pagpakigbato,mas maayo kun magpalapit ang mga ini sa militar, kapulisan kag mahimo man nga sa Punong Barangay ukon alkalde agud ang mga ini ang mabuligan.
Hinali nga sila ang maykaso, mas maayo man nga atubangon ini sa korte.
Samtang pasalig naman sini sa mga magasungka nga madamo sang plano ang gobyerno agud nga makabalik ang mga ini sa sosyodad kag makapangabuhi sang tarong.
Pasalig man sini nga pagaprotektahan sang militar ang mga nagabalik sa sabak sang gobyerno.
Suno kay Javines, kun si Dela Cruz ang nagpresentar sang kaugalingon sa mga militar, mahimo nga wala pa ini nadulaan sang kabuhi.
