Natigayon nga madakop ang top 1 most wanted person sa syudad sang Talisay, samtang ini naman ang nakuhaan sang armas luthang sang ginaserbe ang warrant of arrest.
Suno kay P/Lt. Marion Vicente Buenaflor, deputy Chief sa Talisay City Police Station, ang suspetsado ang ginkilala kay JR Dayanan, tumandok sa Purok Lopuez, Barangay Canlandog, Murcia.
Ini ang nadakop sa Vista 2, Barangay Conception, Talisay City kun sa diin ini nagapanago kag nagatrabaho bilang tapasero sang tubo.
Suno kay Buenaflor, ang suspetsado ang may warrant of arrest sa kaso nga murder gikan pa sa banwa sang Murcia nga gina-alegar tuga sa away sa duta.
Namonitor naman sang Murcia Municipal Police Station nga ini ang nagapanago sa syudad sang Talisay gani nakig-angot ang mga ini sa Talisay PNP.
Bangod sa mabug-at ang kaso ni Dayanan, ini ang ginbutang bilang Top 1 sa listahan sang Most Wanted Person.
Isa man ka bulan nga gimonitor ang suspetsado tubtob sa naserbe ang warrant of arrest.
Apang sa pag-aresto, narecover pa sa paghinakop sini ang isa ka unit sang cal. 45 pistol kag apat ka mga magazine nga naga-unod sang tagduha ka live ammunition.
Sa karun nakahunong sa Talisay City Police Station ang suspetsado kag magluwas sa kaso sini nga murder nga wala sang ginarekomendar nga pyansa, si Dayanan ang pasakaan man sang kaso sa paglapas sa Republic Act 10591 ukon Comprehensive Firearms and Ammunitions Regulations Act kag paglapas sa Comelec Gun Ban.
