Natigayon na nga makuha ang puno sang acacia sa Mansilingan – Felisa Road kahapon.
Madumduman nga ang nasambit nga kahoy ang ginapakuha agud nga mapadayon ang pag-ubra sang dalan sa nasambit nga lugar.
Kahapon, ginkuha na ang kahoy kag ginsaylo sa sanitary landfill sa Barangay Felisa.
Suno kay Bibe Medel, residente sa lugar, kahapon gintambungan sang Tanod sang Barangay Mansilingan kag opisyales sang syudad ang pagkuha sang kahoy.
Suno kay Medel, ang kahoy ang nagtubo lamang sa lugar bangud ang mga ginpangtanom sang mga estudyante sadto ang lunsay nagkalamatay na.
Ginpahayag man sini nga napulo na katuig nga nagatubo ang kahoy sa lugar.
Suno diri, mahimo nga indi na magtubo ang kahoy sa ginsayluhan sini bangud maayo lang kun may yara sang nagakaigo nga kuhaan sang tubig agud ini ang masami nga mabunyagan.
Sa kaangot nga balita, ginpahayag man ni Bacolod Councilor Carl Lopez, chairman sang Committee on Environment and Ecology sa Sangguiang Panlungsod, nga ang contractor ang nagkuha sang puno sang acacia sa Mansilingan – Felisa Road kahapon bangud may yara na ang mga ini sang budget.
Suno kay Lopez ang importante nga natestingan na nila ang pag-earth ball sang kahoy kag positibo ini nga mabuhi ini sa ginsayluhan.
Aminado man ini nga mabudlay ang pagkuha sang kahoy bangud may yara sang linya ang BACIWA nga nalab-ot na sang ugat sang kahoy.
Suno diri iya natun-an nga sa pagsaylo sang kahoy, dapat nga magkoordinar man sa BACIWA agud nga malantaw kun may yara sang maapektuhan nga linya sang tubig kun magearth ball sang kahoy.
Ginpahayag man sini nga kun may yara sang road widening kag may kahoy nga kinahanglan kuhaon, patigayunon sa gihapon ang tree balling.
Gin-athag man ni Lopez nga indi palagpat ang pagsaylo sang kahoy bangud ginahimo na ini sa iban nga pungsod kaangay sang Singapore.
Suno pa diri may yara na sang lugar ang syudad nga patigayunan sang tree planting bangud isa sa tinutuyo sini nga mangin greenest city ang syudad sang Bacolod.
