Gin-athag sang acting provincial election supervisor sang Negros Occidental nga ang pagpatigayon sang kampanya sang mga nagapapili sa National Positions subong nga maga-umpisa na ang Campaign Period, ang magabase man sa Alert Level Status sang isa ka Local Government Unit (LGU).
Nahibaluan nga sumugod subong nga adlaw Pebrero 8, umpisa na sang Campaign Period para sa mga kandidato sa National Positions tubtob na sa Mayo 7.
Kadungan sini, una na nga ginpagwa ang Comelec Resolution No. 10732 kun sa diin napagkit ang mga guidelines sang kandidato sa pagpangampanya.
Kalakip na diri ang pagpatigayon sang in-person campaign, meeting de avanse, public rallies kag mga motorcade.
Suno kay Atty. Roberto Salazar ang pagpatuman ang magadepende man sa kun ano ang Alert Level Status sa LGU ilabi na nga Nationwide ang pagabuhaton nga kampanya sang mga kandidato.
Kalakip na diri ang paglimitar sa makaupod sa in-person campaign ukon paglimitar sa makatambong sa mga public rallies.
Paathag ni Atty Salazar nga antes paman makapatigayon sang pagkampanya ang kandidato sa isa ka lugar, kinahanglan anay sang mga ini nga mag-apply sa Regional Comelec Campaign Committee (RCCC) agud magkuha sang permit.
Sa tion nga makakuha na sang permit ang RCCC ang magapahibalo naman sa Provincial, City ukon Municipal Comelec Campaign Committees nga ang mga kandidato ang may aplikasyon na sa pagpangampanya.
