Ginpahayag sang Executive Director sa Emergency Operation Center (EOC) nga patigayunon sa Riverside Medical Center ang pagkick-off sang pediatric vaccination sa edad nga lima tubtob onse anyos sa Pebrero 14.
Pahayag ni Em Ang, 100 ka mga kabataan ang ila nga pagabakunahan sa kick-off ceremony samtang ang iban ang pagabuhaton na sa tatlo ka mga gindesignar nga mga eskwelahan.
Apang sa karun wala pa nakabatun ang syudad sang notice of shipment natuhoy sa gamitun nga Pfizer doses.
Pasalig naman sang opisyal nga madayon ang pagbakuna sa syudad sang Bacolod sa Pebrero 14.
Aminado naman si Ang nga manubo ang numero sang mga 5 tubtob 11 anyos nga nagparehistro kun sa diin ini ang nagadangat lang sa lima ka libo apisar nga ang projected population sang nasambit nga age group ang nagahamboy sa 79,000.
Ang mga makabahin sa kick off ang nakabase naman sa 1st register 1st serve basis.
Suno kay Ang, matapos ang kick-off ceremony sa Riverside Medical Center, patigayunon na sa tatlo ka mga ginpili nga mga eskwelahan ang pagbakuna.
