Nagdangat sa P150,000 ang balor sang kahalitan nga gintuga sang sunog nga nagluntad sa Hacienda Alicante, Barangay Bungahin, Isabela, Negros Occidental.
Suno kay Fire Officer 3 John Michael Tolosa, Officer Incharge sa Isabela Fire Station, ang kalayo ang nag-umpisa pasado alas-5:00 sang aga kahapon kun sa diin nakontrolar ini alas-5:50 sang aga.
Ini ang nagresulta sa tatlo ka mga pamalay ang totally damaged kag isa nga patially damaged.
Ginapahayag nga nag-umpisa ang kalayo sa balay ni Narciso Villarico.
Kaangay sa balay sini, totally burned man ang balay nanday Kenald kag Azilyn Villarico, samtang ang partially damaged naman ang balay ang ginapanag-iyahan ni Lucina Rama.
Magapatigayon pa sang follow-up investigation ang Isabela Fire Station agud matumod ang matuod nga gintunaan sang kalayo.
Bangod sa semi-concrete ang balay kun sa diin human na sa light materials ang naibabaw nga bahin sini, madasig naman nga naglapta ang kalayo padulong sa tiyangge sang pamilya Villarico kasubong man sa mga kaingod nga balay.
Nabudlayan naman ang mga bombero sa pagsulod sa lugar bangod ginhawanan lang nga kampo sang tubo ang ila alagyan, bangod wala pa nakuha ang mga nagkalatumba nga puno sang kahoy sa mayor nga dalan.
Ginapakamaayo naman ni Tolosa nga wala sang nasamaran sa insidente.
Ang sunog ang nafire-out alas-6:30 sang aga nakahapon kag ini ang nagdugay bangod man sa mabaskog nga huyop sang hangin nga nagapaibwal pa sa kalayo.
