Isa ka lalaki ang nalumos sa isa ka resort sa syudad sang Cadiz.
Ang biktima ang ginkilala kay John Luis Espeda, 23 anyos, residente sa Barangay 14, Bacolod City.
Suno kay Commander Joe Luviz Mercurio, bag-o nga Commander sa Coast Guard Station Northern Negros Occidental, nakabatun sang tawag ang Coast Guard Sub-station Cadiz City alas-3:33 sang hapon nahanungod sa nalumos nga lalaki gikan mismo sa Human Resource Office sang Lakawon Island Resort and Spa.
Gilayon naman ini nga ginrespondihan sang Coast Guard Sub-Station Lakawon 1st kag makapatugayon ang mga ini sang shore operation.
Pag-abot sang mga ini yara na ang lawas sang biktima sakay sa Boat No. 3 sang resort nga MBCA kag ginahulat nalang ang pito pa sini ka kaupdanan sa pag-get together sa isla.
Nahibaluan nga walo sila ang ulupod nga nag get together sa resort apang sa nasambit nga tion, ang mga kaupdanan ni Espeda ang nagbalik na sa ila accomodation room kag may-ara man nga nagpahuway sa cottage.
Samtang ang biktima naman ang nagpabilin sa baybay kag nagpaligo nga naga-isahanon.
Nasapwan nalang sang isa pa ka Island Guest nga ginkilala kau Jasper Geronimo nga nagalutaw ang lawas sang biktima gani gilayon ini nga nagtawag sang life guard nga amo ang nagpatigayon sang Cardiopulmonary Resuscitation (CPR).
Alas-5:00 sang hapon, ang biktima ang nahimo nga matransfer sa Don Bernard Emergency Clinis sa syudad sang Cadiz apang ini ang gindeklarar na nga dead on arrival.
Santo sa inisyal nga impormasyon, ang biktima nang naka-inom sang makahulubog nga ilimnon sang sya ang nagpaligo sa baybayon.
