Ginkompirmar sang tagpamaba sang Bacolod City Police Office (BCPO) nga nakaalerto ang mga kapulisan sa syudad sang Bacolod kadungan sang pag-umpisa sang campaign period para sa mga national candidates sang May 9, 2022 elections.
Sa interview sang Bombo Radyo Bacolod kay Police Lt. Col. Sherlock Gabana, ginpahayag sini nga nakahanda na sila kag ginahulat man sang mga ini ang dugang nga direktiba nagikan sa Commission on Elections sa pagpatuman sang pagsulundan sa campaign period.
Suno kay Gabana, engganyuhon man sang mga ini ang mga kandidato nga ipatuman ang pagsunod sang minimum health protocols bangud nagapadayon sa karun nga nagapangatubang sa COVID-19 pandemic ang pungsod.
Ginpahayag man sang tagpamaba sang BCPO nga mahimo man ang mga grupo nga makatipon agud mapakita sang suporta sa ila mga kandidato apang adapat mapractice ang minimum health standards kag may yara sang clearance nagikan sa Emergency Operations Center sa syudad sang Bacolod.
Ginpahayag man sini nga mas ginpapag-on ang police visibility kag mas nagdamo pa ang mobile patrols sa syudad agud maghatag seguridad sa nagahilapit nga piniliay.
Nagpanugyan man ini sa mga supporters nga magkampanya lamang sa ila mga ginasuportahan nga kandidato kag indi lang nga magpanghilabot sa iban nga supporters man sang iban nga mga kandidato agud nga mangin matawhay ang campaign period sang mga kandidato.
