Ginabanta lima ka balay ang ginlamon sang kalayo sa Efegenio St, Barangay 39, Bacolod City.
Pahayag sang ginkilala kay Charles Famoso, tag-iya sa isa sa mga nasunog nga balay, alas-8:00 sang gab-i samtang yara ini sa babaw sang ila balay kag nagahigda upod sa iya nga manghod ginpinsar pa sang mga ini nga nagahangin lang, apang nakibot ang mga ini sang makita sa bintana nga naga-ibwal na ang kalayo sa likod nila sang balay.
Suno diri, ang sunog ang nag-umpisa sa kaingod nga balay sa likod nga bahin sang ila puluy-an.
Anom ang mga ini sa ila puluy-an nga nahimo man nga makagwa dala ang pila ka mga dokumento, personal nga gamit, wallet kag ang personal computer nga ginagamit ni Charles sa home-based nga trabaho.
Pahayag sini nga pila palang ka bulan sang ila ginpakay-o ang balay.
Ginapakamaayo naman sini nga wala sang nasamaran sa ila pamilya bangod sa sunog.
Samtang ginpahayag naman sang isa pa ka residente sa lugar nga ginkilala kay Jonathan, nga mahimo nagikan sa balay sang ginkilala kay Jake ang sunog.
Paathag sini nga ginatambakan sang karton ang balay ni Jake kag samtang ini ang nagatig-ang, gindakop sang kalayo ang mga karton nga nagtuga sang sunog.
Nakaangkon naman sang kabudlayan ang mga bombero ilabi na nga kitid ang lugar kag naga-inikit ikit naman ang mga pamalay.
Samtang may mga residente naman nga nagatu-ad nga naka-inom sang makahulubog nga ilimnon ang tag-iya sang balay nga ginhalinan sang kalayo nga si Jake, bangod nagbakal pa ini sang whisky antes natabo ang sunog.
