Nagaplano ang mga operators kag drivers sa Bacolod nga magpatigayon sang untat byahe antes ang Marso 16 kun indi pagpatumanon sang local government sang Bacolod City ang ila hingyo nga makahinun-anon tuhoy sa pagphase-out sang mga jeep kag pagpasulod sang modernized jeepney.
Nahibaluan nga lima na ka adlaw nga nagabyahe sa Bacolod City ang labing una nga modernized jeepney, nga may routa Eroreco-Central Market.
Sa interview sang Bombo Radyo kay United Negros Drivers and Operations Center (UNDOC) Secretary General Diego Malacad, nagaistorya pa ini sa ila mga kaupdanan sa simbahan, sa transport sektor kag iban nga kooperasyon kun san-o nila i-set ang ginaplano nga untat byahe.
Suno kay Malacad, ginahatagan nila sang oportunidad ang LGU ilabi na si Mayor Evelio “Bing” Leonardia kun willing pa ini nga sila ang makadialogo tuhoy diri.
Suno sa iya, indi nagakadapat nga iphase out ang tradisyunal nga mga jeep kag i-entertain ang modernized jeepney bangud indi makasakay sa bag-o nga salakyan ang mga nagakarga sang mga manok kag baboy.
Gindugang man sini nga indi dapat pagkuhaon ang kinamatarong sang mga pasahero nga magpili sa kun diin sila masakay.
Suno diri, masobra 3 mil ang mga tradisyunal nga jeep nga nagabyahe sa karun samtang masobra lamang sa isa ka libo ang ibulos nga modernized jeepney.
Nagapanawagan ini nga kun may balatyagon ang alkalde sa mga driver, ila anay irecall kag ireview ang endorsement sang ordinansa tuhoy diri agud makapatawag sang hearing kag consultation sa mga stakeholders.
Gintawag naman sini nga kiningkoy, wala sang kalidad kag wala nagapattern sa kinahanglan sang ciudad ang modernized nga jeepney.
Suno sa iya, peke man ang modernization program sang alkalde bangud wala ini ginpermahan sa opisina sang Land Transportation Franchising and Regulatory Board kag gintago sa Metro Bacolod.
Suno kay Malacad, ang administrasyon sa karun sang Bacolod ang nagapang-imbita sang mga kapitalista nagikan sa luwas sang pungsod.
Suno diri, kun indi pagpamatian sang alkalde ang ila hingyo, mga isa ka semana nga magadugay ang ila untat byahe.
