Kinahanglan pa nga ivalidate sang Philippine Army ang mga natumod nga areas of concern sang Commission on Elections sa probinsya sang Negros Occidental.
Nahibaluan nga 13 tanan ka mga lugar sa Negros Occidental ang gin-identify bilang areas of concern para sa palaabuton nga May 9, 2022 elections.
Sa interview sang Bombo Radyo Bacolod kay Captain Kim Apitong, tagpamaba sang 3rd Infantry Division sang Philippine Army, may mga natumod nga areas of grave concern apang indi man grabe kag manageable ang sitwasyon sang mga katapo sang Philippine Army kag Philippine National Police.
Ginpahayag man sini nga ginalakipan sang apat ka category ang area of concern kag ini ang category Red; Yellow; Orange kag Green.
Suno kay Apitong nagapatigayon sa karun ang Regional Joint Security Control Center (RJSCC) sang pila ka pagsinapol para sa verification sang mga natumod nga areas of concern sa rehiyon.
Suno diri, nahibaluan na kun sa diin ang masami nga area of concern sa Western Visayas humalin pa sang 2019.
Ang Moises Padilla sa Negros Occidental kasubong man ang Lemery, Calinog kag Maasin sa probinsya sang Iloilo ang ginalantaw sang mga otoridad nga concerned areas sa Western Visayas.
Lantawon man sang mga ini ang natumod sang PNP nga grave concerned areas.
Ginpahayag man ni Apitong nga ang isa sa mga problema sang eleksyon amo ang mga terrorista nga Communist Party of the Philippines-New People’s Army (CPP-NPA) bangud sa ginapanghimo sang mga ini nga extortion antes kag sa tion sang piniliay.
Ginaengganyo man sini ang mga kandidato nga magpirma sang peace covenant bilang commitment sa matawhay nga election.
