Nagapangayo sang hustisya ang iloy ni Julius Dumip-ig, nga gin-abduct sang Pebrero 8 sang gab-i sa Purok Boulevard, Barangay 13, Bacolod City kag nasapwan na lamang nga wala na sang kabuhi sa Hacienda San Jose, Barangay Damgo, banwa sang EB Magalona.
Sa interview sang Bombo Radyo kay Juliet Dumip-ig, santo sa pahayag sang live-in partner sang iya bata, updanay sila nga duha nga nagabyahe sang tricycle sang may nagsakay nga duha ka mga lalaki kag nagpanaog sa Purok Boulevard, Barangay 13.
Pagpanaog sang mga pasahero, may nagdulog nga isa ka van nga nagaduag gray ukon violet, may nanaog nga tatlo ka mga persona sa van kag ginpilit nga pasakaon sa van si Julius.
Bangud nga indi magbulag ang live-in partner sa biktima, ginwakli ini sang mga lalaki kag gintiro sa paa si Julius.
Didto na nagdalagan ang live-in partner kag natigayon nila nga na-abduct ang biktima.
Suno sa iloy, nag-ako mismo ang umagad sini nga nagagamit sila sang illegal nga druga apang wala sila nagabaligya.
Suno diri, dungol kag suplado si Julius apang amat-amat na ini nga nagabag-o bangud nagabusong ang iya live-in partner.
Masami man ini nga irritable kag may tinion nga siya ang ginkuga sang iya bata gani nakahambal ang iloy nga kun ano man ang matabo sa iya, indi ini maghibi.
Apang ginaako ni Juliet nga maskin ano ang matabo, bata nya ini gihapon kag nagalaom siya nga mahatagan sang hustisya ang gindangat sini.
Suno diri, kun may atraso man ang ila bata, kuntani gin-istorya lamang ini sang matawhay kag wala ginkuha ang kabuhi.
