Ginpahayag sang Chairman sa Committee on Transportation sa Sangguniang Panlungsod sa syudad sang Bacolod nga kinamatarung sang transport sector kun sila ang luyag nga magpatigayon sang transport strike bilang pagpamatok sa Jeepney Modernization Program sang gobyerno.
Paathag ni Bacolod City Councilor Dindo Ramos, nga ang Jeepney Modernization Program ang programa sang National Government kag indi ni Bacolod City Mayor Evelio “Bing” Leonardia ukon sang bisan sin-o man nga konsehal sang syudad.
Ginakatingala naman sini ang desisyon sang transport group nga United Negros Drivers and Operators Center (UNDOC) nga magpatigayon sang isa ka semana nga transport strike bangod wala paman sang ginapatigayon nga pagphase out sa mga daan nga model sang salakyan.
Suno kay Ramos, suportado sini ang Jeepney Modernization Program apang nagapati ini nga indi pa subong ang nagakaigo nga implementasyon sang programa.
Gindumdom pa ni Ramos nga sang 2019 nagpangayo man sang bulig sa iya ang UNDOC nga maseminar ang mga ini sang Department of Transportation (DOTR) kag seminar para sa Collective Bargaining Agreement (CBA) sang kooperatiba.
Kun sa diin personal pa sini nga kwarta ang gingamit sa pagpamahaw sa tion sang pagseminar nga ginpinsar sini nga ginbuhat sang mga drivers kag operators sa tinutuyo nga mapreparahan inkaso nga ipatuman na ang programa sang National Government.
Paathag ni Ramos nga luyag nila nga makapreparar ang syudad sang Bacolod, sa tion sang implementasyon kag indi madulaan sang masakyan ang mga commuters.
Apang pasalig sini nga wala sila sang pagphase out nga ginahikutar.
Aprubado man sini ang pagpatigayon sang transport strike sa sulod sang isa ka semana, agud matumod man kun ano ang ila luyag nga ipalab-out.
Nagapati naman si Ramos nga indi tanan nga jeepney driver ang magasunod sa plano sang CURE bangod may iban nga mahimo magdesisyon sa pagbyahe bangod palangabuhian ang lagas sang mga ini.
Apang suno sa konsehal, mas maayo kun sa National Government ang mga ini mismo magarally.
Paathag ni Ramos nga kun sa karun na ipatuman ang Jeepney Modernization Program, wala pa sang ikasarang ang mga operator sa pagbakal sang panibag-o nga model nga minilyon ang balor kag bisan ang bangko ang indi paman handa nga magpahanugot sang laon.
