Nagpapanaog na sang direktiba ang regional director sang Police Regional Office (PRO) 6 sa mga unit commanders partikular na sa Negros Occidental nga hugton ang pagbantay sa mga lugar nag gin-identify bilang areas of concern karun nga nagahilapit ang May 9, 2022 National and Local Elections.
Suno kay P/Lt Col. Arnel Solis, tagpamaba sa PRO 6, nga nagpanaog sang mando si P/Brig Gen Flynn Dongbo nga bantayan ang mga nagakatabo sa kada adlaw sa mga nasambit nga mga lugar.
Madumduman nga 13 tanan ka mga lugar ang ginpaidalum sa area of concerns sang Commission on Election (Comelec) sa Negros Occidental.
Pinaagi sa monitoring, mahangpan sang mga kapulisan ang sitwasyon sa ground kag gilayon nga makahuman sang tikang inkaso kinahanglan.
Paathag ni Solis nga ang pag-identify sang mga area of concerns ang kabahin na sang security preparations para sa May 9, 2020 National and Local Elections.
Magadepende naman sa mga ginapatigayon nga meetings sang Comelec, Armed Forces of the Philippines (AFP) kag Philippine National Police (PNP) kun kinahanglan ang deployment sang dugang nga mga kapulisan sa mga area of concerns.
Samtang nakadepende man sa dalagan sang kalinong kag katawhayan sa isa ka lugar ang masunod nga tikang sang PNP.
Paathag ni Solis nga ang masami nga ginabutang sa area of concerns amo ang mga lugar nga may presensya sang rebelede nga New People’s Army (NPA).
Kaangay sa Negros Occidental, madamo man sa mga lugar sa Panay Island nga may pagpamahog sang makawala nga grupo.
Ginatutukan man ini sang mga kapulisan sa PRO 6 kag ginabantayan kun sa diin nakahanda naman ang mga ini nga magdeploy sang tawo kun kinahanglan.
Paathag ni Solis nga wala sang iban nga handom ang PNP kundo ang malinong kag matawhay nga pagpatigayon sang eleksyon.
Suno diri, indi masarangan sang Comelec lang, kasubong man kun PNP lang ang nagahulag para sa matalunsay nga piniliay, kundi importante diri ang pagbululigay sang nagkalainlain nga ahensya sang gobyerno.
Kadungan man nga kinahanglan ang kooperasyon sang mga nagapapili nga politiko kag mga supporters bangod kun malinong kag matawhay ang 2022 Elections, ang pumuluyo man amo ang makabenepisyo.
