Ginahibalo pa sang Bacolod Police Station 1 kun matuod gid man ang alegasyon sang live-in partner ni Julius Dumip-ig, nga ang biktima ang gin-abduct sa Purok Boulevard, Barangay 13, Bacolod City antes ini nasapwan nga wala na sang kabuhi sa banwa sang EB Magalona.
Suno kay P/Major Ramil Sarona, Station Commander sa Bacolod Police Station 1, padayun ang ila nga pagbackground check sa biktima.
Ginkumpirmar sang mismo live-in partner ni Dumip-ig nga ini ang anay napriso na sa kaso nga theft kag robbery.
Dugang pa sini nga nagagamit sang iligal nga droga ang biktima.
Santo sa pagsaysay sang live-in partner, magkaupod ang mga ini samtang nagabyahe sang pampasahero nga tricycle si Dumip-ig sang may duha ka persona nga nagsakay sa ila gikan sa Barangay 35, Bacolod City.
Apang pagdangat sa Purok Boulevard, Barangay 13, Bacolod City, ginpalapitan ang mga ini sang iban pa nga mga lalaki kag didto na gintiro kag gindala ang biktima.
Suno kay Sarona, sa pagpadulong sang imbestigador sa area nga ginatudlo natabo ang abduction, wala man ang mga ini nakakuha sang impormasyon sa mahimo witness sa natabo magluwas sa live-ian partner kasubong man wala man nakabati ang mga pumuluyo sa lugar nga may nagluntad nga komosyon.
Dugang pa ni Sarona nga wala man sila may nakita nga cartridge sang bala sa pihak sang pagpahayag sang live-in partner nga didto palang ginluthang na si Dumip-ig, kag wala man sang bisan isa nga nakabati sang lupok sang armas luthang sa lugar.
Sa pihak nga bahin, ginpahayag naman ni Punong Barangay Ruben James Miranda sang Barangay 35, Bacolod City nga mabuot nga persona ang pagkakilala sini kay Dumip-ig.
Suno sa Punong Barangay, botante sa Barangay 39, Bacolod City ang biktima, apang sa Barangay 35 na ang mga ini nagapuyo sa gina-arkilahan nga balay.
Ini ang nagatrabaho bilang trisikad driver suno sa kapitan, nga lain sa pahayag sang live-in partner nga si Dumip-ig ang tricycle driver.
Paathag sini nga nagakoordinar man sa ila ang biktima kag ini ang simple, mabuot kag halos daw indi maghambal.
Wala man ini sa drugs watchlist sang Barangay gani natingala ini sa natabo nga pagpatay sa biktima, apang indi naman sini masiling bangod mahimo nga may mga personal man nga hilikuton si Dumip-ig.
