Indi magtambong si Presidential candidate Ferdinand “Bongbong” Marcos Jr. sa mga presidential forums nga magaduso sa mga kandidato nga magdebate suno sa iya tagpamaba.
Suno kay Atty. Vic Rodriguez, pagatun-an anay nila ang format sang show agud madeterminar kun makigbahin diri si Marcos ukon indi.
Gin-athag man ni Rodriguez nga wala nila ginalikawan ang nasambit nga mga plataporma apang luyag lamang nga makigbahin sa mga diskusyon nga magapatpat sang mga solusyon tuhoy sa problema sang pungsod.
Suno diri, nakapoy na ang mga Filipino sa paglalisanay kag mga away.
Gani kun magbutang lamang sang mga forum agud mag-enjoy kag makit-an nga naga-away ang mga kandidato, indi na sila magtambong diri bangud nakahibalo ang mga ini nga ang luyag mabatian sang publiko amu ang solusyon sa ginapangatubang nga mga problema sa karun.
Ginpaanggid man ini sang tagpamaba sa isa ka job application kun sa diin naga-apply ang mga kandidato para sa pinakamataas nga position sa government gani indi sila dapat magdebate sa interview.
Gindugang pa ni Rodriguez nga indi man makig-away ang aplikante sa iya amo kundi magapainterview kag itugyan na sa mga boss ukon management ang pagpili kag pagdesisyon.
