All systems go na ang city government sang Bacolod sa rollout sang COVID vaccination sang mga kabataan nga nagaedad lima tubtub 11 anyos sa Pebrero 14.
Sa interview sang Bombo Radyo kay Bacolod Emergency Operations Center Executive Director Em Ang, ginalauman nga magaabot ang Pfizer vaccine anuman nga oras bwas.
Sa karon, wala pa official notice of shipment apang nagalaom ang EOC sang indi magnubo 10, 000 doses nga maigo naman sa 10,000 children.
Nakapaidalom naman sa special training ang mga vaccinators sang ciudad sang Bacolod agud mangin familiar ang mga ini kun ano ang himuon ilabi na sa mga kabataan.
Suno kay Ang, patigayunon ang kick-off sa apat ka sites nga ginalakipan sang Riverside Medical Center, Queen of Mercy Hospital, Corazon Locsin Montelibano Memorial Regional Hospital kag Bacolod City Health Office apang ang seremonya ang patigayunon sa Riverside Medical Center.
May set up naman ang tanan nga site nga daw kaangay sang children’s party kag may audio-visuals agud malingaw ang mga kabataan.
Target sang city government nga makabakuna sang 100 ka mga kabataan sa kada site ukon kabug-usan nga 400 halin alas-9:00 sa aga tubtub alas-4:00 sa hapon.
Nagpanawagan naman si Ang sa mga ginikanan nga mas maayo gid kun mapapre-register ang mga ini agud maestimate kag madasig nalang kun mag-abot sa vaccination site.
Suno sa EOC executive director, ginalauman nga mas madamo ang tawo sa vaccination site apang mabuhin-buhinan ang crowd kun napre-register na ang mga kabataan.
