Welcome kay Negros Occidental Governor Eugenio Jose ‘Bong’ Lacson ang desisyon sang national government nga buksan na ang borders sa mga fully vaccinated international travelers sumugod subong nga adlaw bilang kabahin sang recovery drive sang turismo sa pungsod.
Gin-aprubahan sang pandemic task force sang gobyerno sang katapusan sang Enero ang proposal sang Department of Tourism nga pahanugutan ang pagsulod sang mga fully vaccinated tourists nagikan sa 157 ka mga pungsod nga may vise-free arrangements sa Pilipinas.
Sa interview sang Bombo Radyo kay Lacson, paagi man ini agud nga makabangon ang ekonomiya kun sa diin magaabot gid ang tion nga mangin endemic na ang virus.
Apang plano ni Lacson nga indi na pag-irequire ang mga byahero sang negative RT-PCR test halin sa Metro Manila apang igapaidalom ang mga ini sa rapid test pag-abot sa Bacolod-Silay Airport.
Kun manaog na ang alert level classification sa Alert Level 2 ukon Alert Level 1 suno kay Lacson, iga-adjust naman sang provincial government ang protocol.
Nagpanawagan man ini nga magsuksok gid sang face mask agud indi matapikan sang virus.
Samtang luyag naman sang gobernador nga magapabilin ang Negros Occidental sa Alert Level 3 tubtub sa Pebrero 28.
Suno kay Lacson, ginalauman na ang selebrasyon sang mga tawo bangud election season kag mabudlay icontrol ang crowd kun sa diin indi na masunod ang social distancing.
Suno sa gobernador, ginapaabot na ang involvement sang mga pumuluyo kun nagahilapit ang piniliay.
