Ginkumpirmar sang executive director sang Emergency Operations Center (EOC) sang Bacolod nga may narecord ang syudad nga 21 ka kaso sang Omicron variant sang COVID-19 apang ginpasiguro sini nga lunsay na sila nag-ayo.
Sa interview sang Bombo Radyo Bacolod kay Em Ang, ginpahayag sini nga kada Biyernes nagapagwa sang resulta sang whole genome sequencing ang genome center apang kasubong sang nakaandan nag-alalayo na ang mga ini.
Suno kay Ang, wala sang dapat kahangaw-an ang publiko bangud nag-ayo na ang mga narecord nga kaso kag wala man sang bag-o nga specimen nga ginpadala ang syudad sa genome center.
Ang mga narecord nga kaso ang ginlakipan sang anum nga nagikan sa Barangay Villamonte, tag-isa ka kaso sa Barangay 40; 7; 35; 19; 20; 31 kag 1.
Tag-isa man ka kaso ang narecord sa Barangay Alijis, Taculing; Mandalagan, Singcang; Granada; Tangub; Banago kag duha ang nagikan sa Barangay Estefania.
Ang age group sang mga nainfect ang 20 tubtob 50 anyos.
Ang swab testing ang ginpatigayon pa sang January 5-18, 2022.
Ginpahayag man ni Ang nga nagnubo na ang kaso sang COVID-19 sa syudad bangud man sa epekto sang vaccination sa syudad sang Bacolod.
Samtang, patigayunon naman sang syudad sang Bacolod ang kick off sang vaccination sa 5-11 years old sa February 14, 2022.
Sa February 14 tubtob 15, 2022 patigayunon ini sa Corazon Locsin Montelibano Memorial Regional Hospital kag Bacolod Queen of Mercy Hospital alas 09:00 sang aga tubtob alas 04:00 sang hapon.
Sa February 14,15 kag 16 sa Riverside Medical Center samtang sa February 16, 2022 patigayunon naman ini sa City Health Office.
Sa February 17, 18 kag 19 2022 patigayunon naman ang vaccination sa nasambit nga age group sa St. John Institute kag STI West Negros University.
